កំពង់ស្ពឺ៖ព្រឹកថ្ងៃទី២១ ខែកក្កដា ឆ្នាំ២០២៥ ខេត្តកំពង់ស្ពឺបានប្រារព្ធពិធីអបអរសាទរទិវាអន្ដរជាតិប្រយុទ្ធប្រឆាំងគ្រឿងញៀន ថ្ងៃទី២៦ មិថុនា ក្រោមប្រធានបទ «រួមគ្នា បង្ការ ទប់ស្កាត់ និងកាត់ផ្តាច់ឫសគល់នៃបញ្ហាគ្រឿងញៀននៅកម្ពុជា» ក្រោមអធិបតីភាព ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ព្រមទាំងមានការអញ្ជើញចូលរួមពី ឯកឧត្តម លោកជំទាវ លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងទាំង៣ សិស្សានុសិស្ស និងបងប្អូនប្រជាពលរដ្ឋ សរុបប្រមាណជាង ១ពាន់នាក់ ពិធីនេះដែរប្រារព្ធធ្វើនៅបរិវេណដីទំនេរខាងលិច (វត្តកំប៉ូត) ស្ថិតនៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ។
លោក ឃឹម សុខៃ ស្នងការដ្ឋាននគរបាលខេត្តកំពង់ស្ពឺ បានអានរបាយការណ៍សង្ខែប និងការអនុវត្តន៍ការងាររយះពេលកន្លមក បានបង្ក្រាបចំនួន ៧១៤ករណី លើ ៣០៤ករណី ឃាត់មុខសញ្ញាជួញដូរគ្រឿងញៀនសរុបបានចំនួន ១,២៧៦នាក់ ស្រី ៧៨នាក់ លើ ៤៩៨នាក់ ស្រី ៣៥នាក់ ក្នុងនោះ នគរបាល ៦០៨ករណី ឃាត់មុខសញ្ញា ជួញដូរគ្រឿងញៀនសរុបបានចំនួន ១.០៥៣នាក់ ស្រី ៥៩នាក់ និង កងរាជអាវុធហត្ថ ១១០ករណី ឃាត់មុខសញ្ញាជួញដូរគ្រឿងញៀនសរុបបានចំនួន ២២៣នាក់ ស្រី ១៩នាក់ ដកហូតគ្រឿងញៀនគ្រប់ប្រភេទ ទម្ងន់ ៨.៣២០.៦៥ក្រាម (៨គីឡូ ៣ខាំ) ក្នុងនោះ៖ មេតំហ្វេតាមីនចំនួន ២,៩៧២កញ្ចប់ (២,៥៨២តូច រួមនឹងឧបករណ៍ប្រើប្រាស់គ្រឿងញៀនមួយចំនួន។ បានបញ្ជូន ទៅព្រះរាជអាជ្ញាអមសាលាដំបូងខេត្តកំពង់ស្ពឺ ចាត់ការតាមនីតិវិធី បើប្រៀបធៀបទៅនឹងរយៈពេលដូចគ្នាមាន ការកើនឡើង ៤១០ករណី មុខសញ្ញា ៧៧៨នាក់ ស្រី ៤៣នាក់ ស្មើនឹង ៧០,១៤%។
ក្នុងឱកាសនោះដែរ ឯកឧត្តម បណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ បានមានប្រសាសន៍ថា ក្នុងខណៈដែលប្រជាជនទូទាំងពិភពលោក ក៏ដូចជាប្រជាជនទូទាំងប្រទេសកម្ពុជា បានកំណត់យក ថ្ងៃទី២៦ ខែមិថុនា ជារៀងរាល់ឆ្នាំប្រារព្ធពិធីនេះឡើង ដើម្បីជាសក្ខីភាពបង្ហាញឲ្យឃើញពីការចូលរួមចំណែក ជាមួយរាជរដ្ឋាភិបាល ក្នុងការប្រយុទ្ធប្រឆាំងគ្រឿងញៀន ហើយជាភារកិច្ចដែលយើងទាំងអស់គ្នាត្រូវយកចិត្ត – ទុកដាក់ឲ្យបានខ្លាំងក្លាបំផុត ដោយមិនចាត់ទុកថាជាភារកិច្ចរបស់ថ្នាក់ណាមួយ ជំនាញណាមួយ ឬ បុគ្គលណាមួយឡើយ។
ឯកឧត្តម សូមអំពាវនាវដល់ប្អូនៗយុវវ័យ មេត្តាជៀសចេញឲ្យឆ្ងាយអំពីគ្រឿងញៀន និងត្រូវចងចាំថាទោះក្នុង រូបភាពណាក៏ដោយ ទាំងការជួញដូរ ការផលិត ការដាំដុះ ការប្រើប្រាស់ ឬចាញ់ឧបាយកលគេក្នុងការ ប្រើប្រាស់ គឺសុទ្ធតែត្រូវទទួលការផ្តន្ទាទោសយ៉ាងធ្ងន់ធ្ងរអំពីច្បាប់ ហើយអ្នកដែលអាចជួយយើងបាន គឺមិន មែនបុគ្គលដែលលួងលោម បង្ខិតបង្ខំឲ្យប្រព្រឹត្តនោះទេ ពោល គឺមានតែខ្លួនឯងដែលជួយខ្លួនឯងបានផងដែរ។
ក្រោមការដឹកនាំរាជរដ្ឋាភិបាលកម្ពុជាអណាត្តិទី៧ ដែលមាន សម្តេចមហាបវរធិបតី ហ៊ុន ម៉ាណែត ជាប្រមុខបាន និងកំពុងអនុវត្តយ៉ាងសកម្មនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារសមធម៌ និងប្រសិទ្ធិភាព សំដៅដឹកនាំប្រទេសឲ្យមានភាពរីកចំរើនលើគ្រប់វិស័យពិសេសការពង្រឹងខឿនសន្តិសុខ ស្ថេរ ភាពសង្គម ឈានទៅរកវឌ្ឍនភាពឥតឈប់ឈរ ហើយត្រូវបានការចូលរួមឧបត្ថម្ភគាំទ្រពីសហគមន៍ជាតិ និង អន្តរជាតិយ៉ាងពេញទំហឹង៕
